४.४४ प्रतिशतले बढ्याे सेयर बजार

सेयर बजार आइतबार ४.४४ प्रतिशत बढेको छ । १११ अंक बढेसँगै नेप्से परिसूचक २६२३ अंकमा कायम भएको छ । अघिल्लो दिन २५११ अंकमा झरेको थियो ।

आजको अंक अन्तिम १५ मिनेटको भारित औसत मूल्य गणनापछिको हो । भारित औसत मूल्य गणनाअघि नेप्से ११६ अंक बढेको थियो । मंगलबारदेखि अन्तिम १५ मिनेटको भारित औसत मूल्य गणना विधि हटाइने भएको छ ।

सुरुवाती कारोबारका क्रममा बजार उथलपुथल भए पनि साढे ११ बजेपछि उकालो लागेको नेप्से अन्तिम समयसम्म कायम रह्यो । ९ अर्ब १७ करोडको कारोबार भएको छ । २२४ कम्पनीको मूल्य बढ्दा २८ को घट्यो ।

व्यापार समूह सबैभन्दा धेरै ८.६६ प्रतिशत बढ्यो । डेढ दर्जन कम्पनीको मूल्य १० प्रतिशत बढेको छ । मूल्य धेरै घट्नेमा आज निर्जीवन बीमा कम्पनीहरु अगाडि देखिएका छन् ।